………………………..
” في منزل عائلة الجبراني ”
” بسمله مضايقه من غالب علشان قالتله عوزه اروح عند اهلي قالها ليلي هناك ومفيش مرواح ولما نزلت تقول لحما.تها قالتلها ومين يقف معايا في المطبخ خليكي كفايه ليلي هناك اضايقت من البيت كله ”
انصاف : هنفضل نكنس ونمسح في الصاله والمندره طول النهار سيبي المخروب التليفون من ايدك يا كنز وادخلي اغسلي المواعين اللي في المطبخ
كنز : ما تقولي لزينب تقوم تغسلهم مفيش غير كنز اللي تعمل وتسوي
انصاف بزعيق : هو كل ما اقول لوحده فيكم قومي اعملي حاجه تقولي قولي لتانيه قومي قامت قيامتك اغسلي المواعين بدل ما اتصل بأبوكي يجي يربيكي
كنز قفلت الفون بضيق ودخلت علي المطبخ : ايه الحياه دي يا ربييي فيين الصابون الساايل يا خالة اميمه العلبه اللي هنا فاضيه
اميمه : في علبه كبيره تحت الحوض حطي منها شويه في العلبه الفاضيه ورجعي الباقي مكانه
غالب كان لبس وخلص ونزل علي تحت وكان مصدع جدا : بسمله اعمليلي كوباية قهوه علشان مش قادر من الصداع
بسمله بصلته : انا بمسح الصاله روح خلي حد يعملك
غالب اتجنن من ردها وراح مسك دراعها بغضب : لما اطلب منك حاجه لو بتعملي ايه يغوور وتشوفي انا عاوز ايه فاااهمه
ليلي بصويت : سيب ايدي يا حيوان سيبب
” غالب كان خلاص جاب اخره وهيضـ,ـربها وقفه صوت فاطمه ”
فاطمه شدت بسمله جنبها : من امتي واحنا وجالتنا بتضـ,ـرب نسوانهم يا غالب غلطت ليها اهل يترد عليهم لكن مش نمد ايدينا عليهم
غالب بزعيق : لاء يماا لما المره تكون سافله ومفيش تربيه ولا عارفه تتعامل مع جوزها ازاي حقي انا بقا كاجوزها اعلمها الادب
فاطمه بغضب : اسكتت يا غالب ووطي صوتك عملتلك ايه هي ؟
بسمله بعياط : امبارح قولتله عوزه اروح عند بيت ابويا مع ليلي زعق فيا وقالي لاء خليكي في البيت مدام ليلي راحه قولتله انا مالي بليلي انا عوزه اروح علشان خاطر بنت عمي زعق فيا وراح نام والصبح صاحي مقلوب عليا كدا
غالب بغضب : ودا الوضع ومفيش طلوع من البيت دا غير بمزاجي واقفلي علي الحوار علشان مش عاوز اجي اقفله ليكي بطريقتي ” وطلع علي برا ورزع باب المندره وراه ”
فاطمه بصت لبسمله : شوفي رغم عصبيه مصطفي بس الوحيده اللي بتقدر تسيطر عليه وعلي غضبه هي ليلي اتعلمي منها لما جوزك يغضب تكون هدايته يا بسمله مش تكوني مصدر غضبه
بسمله بعياط : والله انا بتمني الرضا ليه يرضي بس هو كدا لو قفلت معاه تقفل لنهايه
فاطمه طبطبت علي ضهرها : قومي اغسلي وشك واعملي كوباية قهوه ليه واطلعي اعدي معاه برا هو اللي ليكي جوزك وحبيبك وابوكي يا حبيبتي يلا
” بسمله فعلا راحت غسلت وشها وراحت عملت قهوه وطلعت ليه كان قاعد بيشرب سجاير قدام البيت راحت قعدت جنبه ”
بسمله حطت ايدها علي راسه تشوف درجة حرارته : دماغك سخن خد اشرب القهوه علي ما اجيبلك حبايه تاخدها
غالب : مبسوطه يا بسمله تخليني ازعلك وازعقلك كدا
” بسمله بصت للأرض وفضلت ساكته ”
غالب : انا لما اقولك علي حاجه لاء يا بسمله يبقي خلاص لاء انا عارف انا بعمل ايه دراعك وجعك
بسمله : لاء مش واجعني انا مضايقه من معملتك ليا بس
غالب : حقك عليا يا بسب.وسه قومي بقا ادخلي جوا علشان الحاره كلها دلوقتي زمانها قعده قصادنا
بسمله : تصدق ان دي اول مره اخرج اعد قدام البيت من اول ما اتجوزنا
غالب : واخر مره علشان مـ,ـوتيني والا ان الاقي حد من نسوان عيلتنا قاعد قدام البيت اكيد بقا مش هسكت لمراتي
بسمله : طيب انا عوزه اروح لمامتي اشوفها
غالب بغضب : يعني انتي عاوزه كلمتك تمشي عليا برضو مفيش فايده يعني
بسمله : طيب مش عوزه اروح بس خدني هاتلي هدوم لكتب الكتاب بكرا
غالب حاسس بدوخه بس في نفس الوقت مش مبين : طيب يا بسمله اطلعي البسي
” بسمله فرحت اووي زي الطفله وطلعت جري علي شقتها تلبس وغالب دخل لفاطمه وقالها هاتي حاجه لدوخه وجابت ليه ونوعا ما بدء يتحسن بسمله نزلت وراحو علي المول يشترو الهدوم ”
” في المول ”
بسمله وقفه قدام البدله السودا : ايه رأيك اجيب دي ؟
غالب واقف قدام دريس ازرق رقيق جدا : وايه رأيك نجيب دي ؟
بسمله : انا عوزه بدله مش دريس ؟
غالب : ادخلي البسي بس وريني كدا شكله هيبقي عامل ازاي ؟
بسمله بعند : مش هجيبه ؟
غالب بصلها : مش هجيب غير الدريس دا ؟
بسمله بعند اكبر : مش هجيبه يا غالب
” بعد العند والضيق والخناق بسمله جابت الدريس اللي غالب قال عليه وجابت الهيلز والطرحه تحت اشراف غالب ”
بسمله مسكت دراعه : بستمتع اووي وانا بصرف فلوسك وديني افطر في مطعم بقااا
غالب مسك ايدها والايد التانيه فيها الاكياس : اصرفي يمااا اصرفي تعالي عوزه تفطري ايه
بسمله : في وجبه كدا بتكون فيها فراخ بانيه وعيش كيزر وبيبس وكاتشب وحجات من دي عوزه افطر منها
غالب بضحك : هتفطري فراخ ؟! حاااضر ياستي ” واخدها وراح علي المطعم اللي موجود في المول ”
…………………………..
” في منزل مروه ”
” مروه عماله تبص علي الدبله ومبسووطه بيها اوووي ”
نجوي قعده قدام التلفزيون بتتفرج : انتي هتروحي كتب كتاب بنت عم خطيبك دي يا مروه
مروه : ايوا يا ماما جمال كلم بابا ووافق ان اروح ايه المشكله
نجوي : والله يا مروه مش عوزاكي تتغربي عني ماله ياسر ابن عمك جمال احسن منه في ايه ايه المميز في جمال مش في ياسر ؟
مروه بصتلها بغضب بس حاولت تتكلم عادي : جمال انا بحبه وبعد الايام علي صوابعي علشان اكون في بيته ومراته انا متقبله جمال زوج ليا جمال كان معايا وقت حزني وبيقولي انا جنبك متخافيش جمال بيعمل علشاني مش علشان نفسه اوعي في يوم تقوليلي ايه المميز في جمال ومش في ياسر علشان جمال اتخلق علشان يكون ليا وبس يا ماما
نجوي : انا قولت ايه علشان تقومي فيا كدا يابت مكنتش كلمه ؟
مروه : انا مقومتش فيكي يا ماما ولا حاجه انا بس بوضحلك حاجه انتي مش واخده بالك منها مش اكتر
نجوي : ربنا يسعدك يابنتي في حياتك هتلبسي ايه وانتي راحه
مروه : جمال مشرط عليا ممنوع لبس ضيق ولا بناطيل هلبس دريس جديد من بتوع جهاز الفرح بتاعي وخلاص
نجوي : طيب ما تلسي بنطلون من الواسعين اللي عندك علي البليزر وخلي لبس الفرح زي ما هو
مروه : ياستي هو قايل ولا واسع ولا ضيق بناطيل خاالص لاء انا هقصر الشر والبس دريس وخلاص انتهي الموضوع ” وفونها رن وكان جمال وقامت دخلت اوضتها ” الوو ايوا يا حبيبي
جمال : ايوا يا مروه افتحي نت يا حبيبتي بعتلك صور لشقه بعد ما خلصت
مروه بفرحه : بجد يعني العفش بتاعي هيبدء يترتب فيها
جمال ببتسامه : بإذن الله المهم افتحي وشوفي الصور وركزي علي اوضة النوووم يا مروه علشان لو جيتي في يوم تقوليلي مش مرتاحه في شكلها عليا النعمه اعلقك
مروه برفع حاجب : واشمعنا بقا اوضة النوم يا جمال باشا
جمال ضحك : دماااغ زباله بس اوكي هقولك ليه هلشان الاوضه اللي هنقيم فيها لازم نكون مرتاحين فيها احنا الاتنين فهمتي يااا ساالكه
مروه بضحك : بالله انت اللي كلامك غلط ما انت سايب الشقه كلها وبتقولي وركزي علي اوضة النوم عاوزني افهم ايييه
جمال : كل خير يا حبيبتي كل خير شوفي الصور يا مروه وانا هقفل علشان وصلت البنك هسحب فلوس علشان محتاجهم لما اروح هكلمك
مروه : في رعاية الله يا حبيبي ” وقفلت وشافت الصور بتاعت الشقه وكانت مبسووطه اووي بيهم ” والله لو عشه بس جنبك هتبقي قمر وهبقي مبسوطه وفرحاانه
……………………….
” في شقة اسراء ليلي وشهد حرفيا ماااتو من كتر الترتيب والتنضيف في الشقه واسراء اصحابها جم ليها يسعدوها وهي نزلت ليهم تجيبهم اللي كانو جاين نوال و فاتن ”
اسراء ببتسامه : ادخلي يا نوال مالك يابنتي مفيش حد دا ليلي وشهد مفيش حد غريب ادخلي يا فاتن
اسراء : احنا الاتنين انا وصفوان هو اختار حجات وانا حجات
نوال كانت وقفه في الشباك شافت مصطفي وهو نازل من العربيه : بناااات تعالووو شوفو المز اللي ناازل من العربيه دا كدا مييين دا يا اسراء
فاتن راحت بصت معاها : ايه الشياكه والاناقه دي دا مخلووق اكيد غلشان يكون جوزي ” وضحكت ”
شهد بهمس لليلي : دول بيحبو في مين ؟ وبعدين هو اي حد بيشوفوه بيحبو فيه
نوال : اسراااء دا مين الواد دا يلزمني
اسراء راحت بستغراب : هو مين دا ” وبصت من الشباك ” دا مصطفي جوز ليلي ؟
” ليلي كانت بتمسح في المرايه بتاعت البار بالورقه اول ما سمعت اسم جوزها ايديها وقفت بالورقه علي المرايه وسمعت معاكسات البنات ليه الدم غلي في عروقها وبصت ليهم بكل غيره وشر ”
ليلي :………؟!
الفصل الثالث و الاربعون 43
ليلي بصت ليهم بكل غيره : هو المز الوتكه القمر اللي مفيش منه اتنين اللي انتو نازلين معاكسه فيه دا محدش عرفكم انه جوزي ولا ايه
فاتن : بجد اصل انتي صغيره عليه اووي يا ليلي متوقعتش انك مراته
ليلي بغضب : وانتي مالك صغيره عليه ولا كبيره هو جوزي انا واختارني انا وبحبه واخر مره هقولك اتلمي بدل ما المك
نوال بصت ليها : جوزك قمر يا ليلي بصراحه والجمال لازم يتقدر ولا ايه ؟
ليلي بغضب : لو عينك انتي وهي جت علي جوزي تاني وحياة بنتي لخلعها من مكانها انا بس مش همد ايدي علي وحده منكم علشان انتو في بيتنا غير كدا كان هيبقي كلام تاني ” ونزلت علي تحت كان مصطفي قاعد مع سالم واحلام ورشا شايل سلمي علي رجاله ”
ليلي بغضب واندفاع : انت جيت لييه ؟
مصطفي بستغراب : جيت ليه ؟ هو حضرتك مكنتيش عوزاني اجي ولا ايه الوضع
احلام بغضب : ماالك يا ليلي هو ايه اللي جيت ليه جوزك يجي في الوقت اللي يريحه ؟
” ليلي شالت سلمي من علي رجله حطيتها علي رجل احلام واخدته علي اوضتها وقفلت الباب مصطفي كان هيزعقلها علي اسلوبها بس اتصدم منها لما حضـ,ـنته وعيطت ”
ليلي بعياط : انت جوزي لوحدي وحبيبي لوحدي انا اللي ليا حق اتغزل فيك واحبك محدش يشاركني فيك لو بنظره
مصطفي طبطب عليها : انا جوزك لوحدك وملكك لوحدك محدش هيشاركني فيكي ولا اقدر اكون مع حد غيرك بطلي عياط بقا ونتكلم بهدوء مالك في ايه
ليلي بعياط : اصحاب اسراء عمالين يقولو عليك مز ووتكه ومعجبين بيك وبشكلك
مصطفي بحنان : اخرهم يبصو عليا من بعيد كدا لكن انتي تبصي عليا من بعيد ومن قريب يوم بكون في حضـ,ـنك انتي وبحبك انتي واختارتك انتي وخلفت منك انتي
ليلي بصت ليه بعيون باكيه : مستحيل تبص لوحده غيري صح ؟
مصطفي قلبه وجعه علي عياطها مسك وشها ومسح الدموع من عيونها وباس شفايفها برقه وقال بهمس : لما يكون معايا القمر هحتاج ايه من النجوم قلبي اللي اختارك وقلبي اللي اجبرني علي حبك يا ليالي نطلع بقا بدل ما يفكرو حاجه غلط خصوصاً الطريقه اللي اخدتيني بيها من قدامهم
ليلي بإحراج : هتكسف اطلع قدامهم ياتري فعلا فكرو ايه ؟
مصطفي : انتي مراتي يابت اللي يفكر يفكر محدش ليه عندي حاجه المهم انا جيت اشوف سلمي واشوفك علشان هنزل القاهره كدا في شويه حجات هعملهم وهاجي اخدكم ونروح
ليلي : هتروح القاهره لوحدك يا مصطفي ؟
مصطفي وهو بيحرك ايده علي خدها : يا حبيبي متقلقيش انا هروح في النور اهو
ليلي : وهترجع في الضلمه وطريق البلد كله زراعي قلبي هيفضل قلقان لحد ما تيجي …. طب هد غالب معاك ؟
مصطفي : غالب لازم يفضل في الارض علشان احنا اخر الشهر هيحاسب المزارعين وهيشوف الحسابات مع جدي وابويا متقلقيش والله هحاول اجي بدري
ليلي باست خده : ارجلي بألف سلامه انا هفضل عنا لحد ما ترجع تاخدني معاك وانت مروح
مصطفي: عيوني ليكي يلا اطلعي خدي سلمي وابعدي علي ما اطلع انا علشان ماشي
ليلي فتحت الباب : احلاام خدي سلمي واستخبي علي ما مصطفي يطلع علشان متعيطش وراه
احلام قامت اخدت سلمي ودخلت المطبخ : يلا خليه يطلع
مصطفي طلع وليلي وراه ركب العربيه وبص ليها : عوزه حاجه اجيبها وانا راجع ؟
ليلي ببتسامه : عوزاك ترجعلي بسلامه
” مصطفي ابتسم ليها وبعتلها بـ,ـوسه علي الهوا ومشي وهي دخلت علي جوا بعد ما العربيه بتاعته اختفت ”
ليلي في نفسها : حقيقي مبحسش بأمان غير وانا معاه ؟!
احلام : ليلي تعالي خدي سلمي رضعيها علي ما اشوف الفرخه استوت ولا لسه
ليلي : جيالك اهو يا احلام ” وراحت عندها في المطبخ اخدت سلمي منها وقفلت باب المطبخ وقعدت ترضعها ”
احلام جابت كبدة الفرخه وحطيتها في بوق ليلي: علشان تقدري ترضعي بنتك يلا ابلعي … عمله ايه انتي وجوزك يا ليلي ؟
ليلي : كويسين خالص الدنيا تمام ماما اميمه كويسه معايا هي لازم تسمع الواحد كلمتين بس خلاص اتعودت وماما فاطمه وباقي البيت كله كويس معايا برضو
احلام بفرحه : يحبب فيكي خلقه يابنت قلبي ياارب
ليلي : بس عوزه اخد حبوب منع حمل او وسيله تمنع الحمل لحد ما سلمي تكبر شويه
احلام : يا خيبه خلفي منه كل ما تخلفي تقوي علقتك بيه وتخيله مربوط بيكي علطول
ليلي : اسكتي يا احلام هو علشان اربطه بيا امـ,ـوت نفسي دا الحمل والولاده والرضاعه دول اصعب ما في الحياه هده وبعدين مصطفي عمره ما يتخلي عني
احلام : انا قولتلك اللي عندي بس قبل ما تاخدي منع حمل والكلام دا تعرفي جوزك الاول
ليلي : ما انا هعمل كدا انشاء الله
…………………………..
” في صلاة العصر في المسجد اللي جنب البيت صفوان وجمال وسالم ورجاله من البلد بيصلو ورا الشيخ وبعد الصلاه ”
الشيخ محمود ببتسامه لصفوان : مبارك عليك يا صفوان بيقولو كتب كتابك بكرا صحيح الكلام دا ؟
صفوان باس ايد الشيخ : انشاء الله بكرا كتب الكتاب والدخله مش هنعمل فرح علشان هنسافر السعوديه نلحق الحج انشاء الله
الشيخ محمود بفرحه: ربنا يكتبلك في كل خطوه في حباتك سلامه وفرح ديما احيك علي فكرة عزم الفرح دي بجد واسراء بنت اصول انها وفقت في كلامك
صفوان : اسراء تربية ايدك يا شيخ البركه فيك ربنا يديك طولة العمر وانشاء الله فرحتي مش هتكمل غير بيك بكرا
الشيخ بص لجمال اللي قاعد جنب ابوه بيسبح علي صوابع ايده وفي ايده الدبله : فرحتي في الدنيا ان شوفتك جمال حفيد المرحوم غفران الجبراني بجد يا جمال
جمال ببتسامه : ربنا يهدينا يا شيخ ويقربنا منه اكتر واكتر
الشيخ محمود ببتسامه وهو بيشاور علي الدبله بتاعت جمال : لو رضيت ربك ربك هيرضيك يا جمال و الانسان يامااا بيعمل ذنوب بس امتي الانسان يحس ان مؤمن بجد لما يغلط غصب عنه بس يرجع يتوب لربنا يكلم ربنا في اللي نفسه فيه يشكيله همه وحزنه وخوفه وسعادته شاارك ربنا في كل حاجه في حياتك مهما كانت وربنا حليم وستار وغفور ورحيم وجميل ولا ايه يا عم جمال ” وابتسم اوي ”
جمال ببتسامه وارتياح : حقيقي يا شيخ والله العظيم
الشيخ محمود سند علي صفوان لحد ما قام وقف : خلصنا عباده نقوم نشوف مصالحنا بقااا يلا يا رجاله ربنا يوفقكم ويوفقني يارب ” مشي الشيخ محمود ووراه جمال وصفوان ”
صفوان بتعجب : بستغرب الشيخ محمود دا اووي يا جدع
جمال بستغراب : بتستغربه ليه اشمعنا ؟
صفوان : يفضل يتكلم علي التعداد ديما وان لو مقتدر اتجوز دا شرع ربنا وهو مقتدر والشيخه لمياء مراته مبتخلفش ورغم كدا رافض يتجوز عليها حاجه غريبه صح ؟
جمال : احنا في زمن ابن ستين كلب تقدر تقولي الشيخ محمود هيعرف يجيب وحده في ادب واخلاق واحترام الشيخه لمياء دي ولو فيه وحده بنت ناس مثلا الشيخ محمود بيحب مراته وبيحترمها ممكن مش عاوز يجـ,ـرح مشاعرها وبعدين احنا مااالنااا قعدتك مع غالب جوز بسمله اختي خليتك متطفل علي الدنيا كلهااا
صفوان بتسقيف : هتجوز هتجوووز انا خلاص هتجوز وهبص علي البنات
جمال بيكتم بوقه : هتجوز وهبطل ابص مش هبص اتجوز الاول بعدين طلق بلاش تطلع من الدنيا قبل ما تدخلها تمام
صفوان بخضه : احيييه لو اسراء سمعتني طلاق تلاته لتعميني ؟!
………………………………..
” في المطعم عند بسمله وغالب ”
بسمله وهي بتاكل الكباب اللي غالب طلبه : تصدق بالله الكباب هنا جميللل اووي
غالب وهو بياكل الفراخ اللي بسمله طلبتها : ولا الفراخ احنا عرفين انها كانت فراخ منيله وميته بس برضو هناكل منها
بسمله : الحاجه الحرام كدا ليها طعم مختلف نسيييييت
غالب : عليا الحلال من ديني ما هجيب حاجه تانيه عوزه تتكلمي اتكلمي في اي حاجه بس ابعدي عن الفلوس جيبي وجعني والله
بسمله : كنت مفكره جدي الله يرحمه بخيل طلعت انيل منه يا غااالب وبعدين خلاص قفلتني من ام السؤال
غالب بغيظ : جااايبلك فستان ب 600 جنيه وجزمه ب 300 وطرحه ب 150 وقلم روچ ب 70 بغديكي اهو هندفع بتاع 500 جنيه وتقوليلي بخيل هلبسك في الطبق اللي قدامك
بسمله : اولا اسمه دريس مش فستان واسمه هيلز مش جزمه واسكه ليب جلوس مش روچ خليك مثقف لو سمحت
غالب : هنسيب الموضوع المهم وهنمسك اسمها الجزمه والهيلز بسمله من الاخر كدا علشان ترتاحي انا لسه معايا في جيبي 170 جنيه هجيب علبة سجاير ب 40 وهمون العربيه ب 130 ارتاااحي بقاا
بسمله : انا ولا العربيه يا غالب ؟
غالب : العربيه ليها لازمه وشيلاني ؟
بسمله : وانا مش شيلاك يا غالب ؟!
غالب بغمزه : من نحية شايله ف انتي بتشتالي والله مفيش كلام في الحته دي
بسمله وشها احمر من كتر وقاحته : انت بتقوول ايه اتكسف يا غالب
غالب بضحك علي شكلها : مكسوف والله وقااعد اهوو كلي كلي الاكل هيبرد
…………………………………
” اليوم عدي والساعه بقت 11 بليل جمال طلع ينام هو وصفوان وسالم علشان ما.تو في الشغل النهارده سلمي اللي مش مبطله عياط طول الوقت ومتعلقه في ليلي وخايفه من الكل ، اسراء وشهد عوزين يشغلو اغاني ويرقصو بس جواهم حزين علي جدهم اللي صورته في نص الصاله ”
ام صفوان : كدا الشقه خلصت يا اسراء صح ؟
اسراء : ايوا هدومي اترتبت في الدولاب وهدوم صفوان وكل حاجه جاهزه خلاص
رشا : ربنا يتملكم علي خير يارب هنعمل ايه يا احلام بكرا ؟
احلام : ولا حاجه هنعمل اكل علشان ليلي وجوزها وبسمله وجوزها وعيلة الجبراني كلها هتيجي بكرا وكتب الكتاب اهو بليل
اسراء : اصلا في ناس بكرا جايا هيتعملو الكوشه وهيرتبو الصاله وهيعملو الزينه هنا
” ليلي كانت ماشيه بسلمي قدام البيت يمكن تنام بس مفيش فايده دخلت بيها جوا وفضلت تمشي ”
رشا : هاتيها شويه يا ليلي واعدي ارتاحي يا نن عيني ولا عرفتي تكلي ولا تشربي ولا تنامي منها
ليلي بتعب : والله يا ماما رشا مبهدلاني متعلقه بمصطفي اووي يفضل قاعد معاها ومجرد ما ينزل يروح الشغل تفضل تعيط لحد ما يرجع وانا قاعده بيها وبليل عوزاني اصحي بيها ارضعها
احلام : قولتلك ولا هتبقي قد جواز ولا خلفه ولا حمل مسؤليه قولتلي لااء
ليلي بضحك : احلااام كل تعبي يهوون ساعة ما انام في حـ,ـضنه بليل دا كفايه كلمة ام سلمي منه يولييه
اسراء بضحك : اوعدنااا يارب
احلام بضحك : شوفي العيااال يولاد ؟!
” عربية مصطفي وصلت قدام البيت وزمر لليلي انها تطلع ”
ليلي طلعت ليه جري : اخيراااااا وصلت قلبي كان هيقف من الخوف
مصطفي شايف فرحة بنته ومراته بشوفته : حبايب قلبي اللي وحشوني يلا اركبو يلا ” واخد سلمي من ليلي ”
احلام طلعت بشنطة الاكل : ما هو من لقي احبابه نسي اصحابه خدي الاكل بتاعك قبل ما تمشي وتنسيه وبعدين ادخل يا مصطفي اتعشو وامشوو
مصطفي : انا جعاان نووم يا ام اسراء والله هروح احط راسي علي المخده واناام
احلام بصت لسلمي اللي فرحانه : ضحكتي يعني يا ست سلمي
” مصطفي ضم سلمي لحـ,ـضنه بحب وضحك ليلي اخدت الاكل وودعت الكل وركبت جنب جوزها ”
مصطفي : يلا مع الف سلامه يام اسراء وصلي سلامي لأبو جمال
احلام : في رعاية الله مع السلامه
