بعد يوم طويل في الشغل فتحت موبايلي على صورته بصيت فيها واتهندت قطع اندماجي مع ملامحو صوت سلمى صحبتي وهي بتقول:
_يلا يا ست العشقانه هتباتي هنا ولا اي؟
_بحبو يا سلمى بحبو
_الدنيا كلها عارفه يا قلب سلمى بس احنا عمرنا ما نروح نقول
_طب هو ليه مش حاسس بيا؟
_عشان اخويا ده جبله مبيحسش ده لوح من التلج ولا عنده قلب ولا مشاعر
_ماتقوليش عليه كدا يا سلمى والا هزعل منك ده جميل ده أعظم رجال الكون
_يوسف بطيخه بقا أعظم رجال الكون؟ امشي يا روز الله يرضى عليكي
خدت حاجاتي ونزلنا سوا من الشركه واستنينا الاوبر وبعد شويه كان وصل وركبنا سوا
_هتروحي على بيتك ولا هتيجي عندي؟
_يوسف اخوكي هيكون في البيت ولا لاء؟
_لاء زمانو راح شغلو
_خلاص مش جايه
_يا واطيه كنت بختبرك هيكون في البيت ياختي
_خلاص هاجي معاكي عشان اشوفه اصله واحشني اوي
_انا مش عارفه فيه اي زياده عن بقيت الناس عشان تحبيه اوي كدا هو اخويا اه بس انا مش شايفه انه يجنن زاي مانتي شايفاه
_بحبو يا سلمى بحب شخصيته تقيل كدا وعاقل وراسي عارف هو عايز اي مش تافه زاي شباب اليومين دول ده مش شاب ده راجل
_امم بختصار يا روز يا حبيبتي انتي بتحبي اللي يديكي على دماغك
_لو هاخد على دماغي منو هو مفيش مشاكل
شوية وقت وكنا وصلنا عند البيت حاسبنا سواق الاوبر ونزلنا طلعنا العماره
وقفت سلمى ترن الجرز ودقايق وكانت مامتها فتحت
_اهلآ اهلآ إزيك يا روز
_ازيك انتي يا طنط عامله اي
_مش قولنا بلاش طنط دي
_ااه صح إزيك يا خالتي اخبارك اي
_كويسه يا حبيبت خالتك خشو يلا عقابل ما احضر الغدا ونتغدا سوا
دخلنا وانا عيني على باب اوضته مظهرش ليه مش سامعه صوتو ليه معقول سلمى تكون ضحكت عليا عشان اجي معاها وخلاص؟
ولسه هسأل سلمى هو فين قطع سؤالي خروجو من الحمام بص ل سلمى وقال:
_حضريلي قهوتي واكوي البدله بتاعتي عشان هتأخر على الشغل
_اعمل اي ولا اي اختار حاجه واحده انا مش بمليون إيد يا يوسف
_اعملي الاتنين يا سلمى وتاني مره تردي بأسلوب احسن من كدا
قالها وسابنا ودخل اوضته
سلمى نفخت من طريقته الحاده
بصيت ليها وقولت:
_روحي انتي اكوي البدله وانا هقف اعمل القهوه مع طنط جوه
_انتي حره يكش تطلع مش مظبوطه ويزعقلك
_على قلبي زاي العسل مالكيش دعوه<!–nextpage–>
قولتها ودخلت ل طنط المطبخ وقفت اعمل القهوه بالطريقه السريه بتاعتي ..
فقط القليل من البُن والحليب وقلبي . .
اختارت فنجان لذيذ لونو بينك وافتكرت إن معايا شكولاته كيندر في شنطتي جبتها وحطتها جنب فنجان القهوه وخرجت وانا بتمنى من كل قلبي انها تعجبه
_هو فين ؟
_مشي قال انه اتأخر على شغلو وهيشرب قهوته في المكتب
_طب والقهوه اللي عملتها؟
_اشربيها ياختي بعدين اي الفنجان ده؟ وانتي بتقدميها ل ابن اختك ده يوسف يا روز يوسف
_طب ينفع اشربها في اوضته؟
_هو ينفع بس متلمسيش حاجه عشان هيعرف
_طيب
فتحتلي باب اوضته ودخلت هي ل مامتها في المطبخ ودخلت انا الاوضه وانا بتأمل في كل حاجه فيها سريره مكتبو الكتب اللي بيقراها برفانو ويالهوي بقا من برفانو
حطيت فنجان القهوه على التسريحه ولسه همد إيدي اخد البرفيوم بتاعه اشمها زاي كل مره قطــ,,ـــــعني صوته وهو بيقول:
_انتي بتعملي اي هنا ؟
لفيت ليه وانا متجمده في مكاني مش عارفه انطق من خوفي منو ومش عارفه اتشجع واتكلم من جمالو وهو ب البدله الميري
_انطقي بتعملي اي هنا؟؟
جت سلمى في الوقت المناسب وقالت:
_هي عملت القهوه وكانت فاكرك لسه موجود ودخلتها ليك يا يوسف .. انت اي رجعك مش قولت إنك مستعجل؟
_ااه بس نسيت محافظتي
فتح الدرج خد محافظتو وقفلوا تاني وكان هيمشي بس رجع مسك فنجان القهوه وشرب منو بوق وقال:
_قهوتك نيه المفروض تستني عليها اكتر من كدا وسكرها كتير تبقي تقللي السكر اكتر من كدا والقهوه مبيتاكلش معاها شكولاته ولا اي نوع من الحلويات بلاش عك ويلا يا سلمى انتي وصحبتك من اوضتي من غير مطرود
قالها وخرجنا انا وسلمى من اوضته خدت القهوه شربتها في اوضة سلمى وانا بعيط من طريقته الجافه
_خلاص يا روز اهدي مانتي عارفه ان دي طريقته من زمان ومع ذلك بتحبي
_هو فاكرني متهمه عنده يا سلمى ازاي يعاملني كدا
_هو بيعاملنا كلنا كدا وانا قولتلك مش هتعجبه وهيزعقلك قولتي على قلبي زاي العسل
_بس ده عسل مُر ده عسل ماسخ مش مسكر
_واي اللي رماكي على المُر يا ست روز
_بحبو
_ااه من الحب ووجع قلبه يا ناس هروح اشوف ماما واهدي بقا
سابتني وخرجت شربت اخر بوق من القهوه اللي طلعلي فيها عيوب قد كدا وانا بفكر هو ليه كدا؟ ليه مش عادي
مش يمكن اللي محببني فيه اصلآ انه مش عادي غامض وعميق عمره ما سلم عليا على طول بيتجاهلني كأنه مش شايفني اصلآ مش يمكن ده المميز فيه ؟
بعد ما قعدت مع طنط وسلمى عشان ميزعلوش روحت البيت وانا بفكر فيه وفي قلبي اللي سايبني ومطاوعه غيرت هدومي ولبست بيجامه مريحه بحبها
ودخلت المطبخ عملت فنجان قهوه سويت القهوه كويس ومحطتش سكر كتير ومكلتش معاها شكولاته ولا اي حاجه عشان ميبقاش عك
ومع اول بوق من قهوتي افتكرت حكايه قرأتها زمان تشبه ل حكايتي
كانت حكاية الجنايني اللي حب اميرة القصر بس انا قصتي تختلف
انا الجنايني وهو امير القصر!
الحب من طرف واحد مُلك انا مستاهلش اني متحبش انا استاهل اني اتحب ب الطريقه اللي استاهلها ويتمشيلي بلاد
من تاني بوق من القهوه قرارت اني خلاص هشيلو من دماغي وهبطل احبه فتحت موبايلي عملت بلوك ل رقمه اللي هو ميعرفش انه معايا اصلآ
واخر بوق من قهوتي جتلي فكره حلوه تخليه يحس بيا فا اتصلت ب سلمى صحبتي احكيلها على الخطه الجديده
ورجعت احبه وافكر فيه تاني وفكيت البلوك عشان انا مهزقه وهعمل خطه جديده عشان يحبني وبعد دقايق من الانتظار سلمى ردت
يتبع..
بقلم شهد محمدبعد شويه من ألانتظار سلمى ردت
_خير يا روز هانم
_خير يا ختي خير . . انا جتلي فكره تخلي اخوكي يتحرك وياخد خطوه من ناحيتي
_اي هي قولي
_نقول قدامه إن جالي عريس وقتها هو يتجنن بقا ويبقا عايزني أرفض وكدا
_هو انا مظنش إنه ممكن يعمل بس ماشي نعملها يمكن تيجي ب فايده بكرا تعاليلي ونعمل الحوار عليه بس يا خوفي لا يعرف اننا بنحور
_وهيعرف منين يا سلمى
_متنسيش إن يوسف ظابط مخابرات يا روز يعني يعرف الكداب من الصادق
_طب والحل
_بصي متبصيش في عينو وانتي بتتكلمي عشان قالي في مره إن البيكدب في حاجه في عينو بتتحارك باين وحاولي تسيطري على حركاتك وانتي بتتكلمي عشان ده بيفهم في لغة الجسد
_ياربي منو بيعرف في كل حاجه
_يوسف بقا هو اي حد
_طيب خلاص هجيلك بكرا
_تيجي بدري قبل ما ينزل الشغل يا روز
_اتفقنا
قفلت مع سلمى وانا بتخيل اي اللي ممكن يحصل لو خططي نجحت نمت وانا بفكر فيه
وجيه تاني يوم صحيت بدري غيرت هدومي وعرفت ماما انا رايحه فين وروحت على بيت سلمى على طول
رنيت الجرز وثواني وكان هو اللي فتح الباب فتحو ودخل من غير ولا سلام ولا كلام البارد سلمى شافتني جت عليا وقالت:
_اهلآ اهلآ ب العروسه
_عروسه اي يا سلمى لسه مفيش حاجه
طنط مامتها قالت:
_اي يا روز هنفرح بيكي قريب ولا اي؟
_مش اوي يعني يا خالتي هو عريس متقدملي لاكن انا مش موافقه
_ليه يا بنتي اي اللي يعيبو؟
_ميعبوش حاجه والله يا خالتي بس انا اللي مش عايزاه انا عايزه واحد ليه هيبه كدا مقامه عالي وياسلام بقا لو ظابط زاي أبطال الروايات
_الروايات كلت دماغك إذا كنتي انتي ولا الموكوسه التانيه اقعدي افطري يلا اقعدي
قطع كلامنا صوتو من اوضته وهو بيقول:
_القهوه يا سلمى
دخلت سلمى عملت القهوه وقدمتها ليه شربها في اوضته ونزل من غير ولا كلمه
ونزلنا انا وسلمى روحنا الشغل واحنا قفانا بيأمر عيش زاي مابيقولو
_اخوكي ده بني ادم زاينا ولا حجر ده لوح ده لو ابو الهول كان نطق ده انا قولت عايزاه ظابط اعمل اي تاني اقول اسمه عشان يفهم؟
_انا قولتلك ده مفيش حاجه هتهزه
_ماليش دعوه يا سلمى اتصرفي عايزه اتجوزه اي الحل؟
_الحل إنه يحبك
_ويحبني إزاي؟
_معرفش يا سلمى معرفش يوسف اخويا غامض يعني معرفش بيحب اي وزوقه اي واي اللي يرضيه محدش فاهم يوسف ولا يعرف دماغو فيها اي
روحنا الشغل وانا فاقده الأمل فيه وفي قلبي اللي بيحبو
عدا يومين وانا مبروحش عندهم وماليش دعوه بيه وهو مسألش زاي عادته
وانهارده بعد الشغل سلمى كانت مصممه إني اجي معاها عشانها مش عشانه
وفعلآ روحت معاها قعدت معاها هي ومامتها
_صحيح يا روز يابنتي عملتو اي في حوار العريس
_رفضتو والله يا خالتي
_ربنا يرزقك ب ابن الحلال اللي يستاهل قلبك يا حبيبتي
_يارب يا خالتي عن اذنكم امشي بقا عشان اتأخرت
قومت وهزيت الكرسي اللي عليه العصير فا وقع عليا ومكنش ينفع امشي ب هدومي المتبهدله فا لبست دريس من عند سلمى وسلمت عليهم ومشيت
ووانا على السلم شفته عيني جت في عينو ومتكلمش وبعد خطوتين وقفني صوتو وهو بيقول:
_استني
لفيت ليه وانا مش مستوعبه انه هيكلمني وقولت:
_نعم في حاجه؟
_الدريس اللي انتي لابساه ده مش قصير شويه؟
_ولا قصير ولا طويل معقول يعني
متكلمش سابني ومشي هو اه حركه مش لطيفه انه يسبني ويمشي من غير ولا كلمه بس انا الفرحه مش سايعني انه اتكلم معايا روحت البيت وانا طايره من الفرحه
روحت البيت اتصلت ب سلمى عشان احكيلها
_شفتي اللي حصل
_لاء مشفتش
_اخوكي كلمني يا سلمى كلمني
_بجد قالك اي انطقي قولي قالك اي
_كنت نازله من السلم وهو طالع وقفني وقالي استني قولتله نعم في حاجه قالي الدريس اللي انتي لابساه ده مش قصير شويه قولتلو معقول ولا قصير ولا طويل وبس كدا سابني ومشي
_شكل كدا والله واعلم غيران عليكي يابت ياروز عشان بعد مامشيتي هو كان طالع مضايق
_بجد غيران اني لابسه قصير خلاص هجيلكم بكرا وانا لابسه ضيق وقصير وعريان عشان يغير
